nenti ci fa
- Nenti ci fa!
- Chi è? Chi fu?
Lu sintiva diri,
ora capita a mia.
Li cannarozza mi sientu rascari,
curpa d’un pinsieri.
Sinceramenti
nun sacciu nzocch’è.
Na cosa acchiana e scinni
un gruppu
un cutugnu
nun sacciu
pari un santòmu
c’ammurra
ccà ccà
ngiarratu
nni la vucca di lu stomacu
comu un surci chi s'intana
ncuttumatu
na serpi ca spirisci
suonnu ca stramuscisci
firnicia
puisia, diciemmu,
di unu c’abbrazza nievuli
parla cu l’arbuli
e hiavuria la terra
e la piglia e la nserra
e stringi nni li pugna
(sopiddra
nni la testa nzoccu arregna)
e la fa sciddricari
e mentri di li pugna cuculia
a cannulicchiu
lu vientu la stravija:
mancu n terra
pò arrivari, la terra,
c’addiventa
pruvulazzu
aria
nievula
rina di mari
farina macinata
cuttuni affinatu
parola straminiata
bannera sbintuliata
pinsieri ca ci hiuhi
e vola
…neglia nni lu chianu
s’agnunìa
ncapu la muntagna
si nn’acchjana
e spercia di dda banna
ca mancu si sapi chi c’è
e attrova genti ca nun canusciu…
Pazzu sugnu?
Vulissi jiri anchi senza ali
appriessu di ddra terra sciddricata
di li pugna
addivintata
nievula
neglia
aria
rina di mari
farina macinata
paci addisiata
assicutari l’aria, di tutti
addivintari hiatu:
di nutrichi
di cristiani granni
di cristiani nichi
palora addivintari
ca pari scappatizza
e nni la testa acchiana
e di la testa scinni
nni lu cori.
…e lu munnu vulissi abbrazzari
prima ca iddru finissi
prima, lu sacciu, ca iu
a iddru l’aju a lassari.
Pazzu? Pazzia?
Forsi.
Forsi filicità.
Forsi puisia.
Forsi puisia.
Tu chi dici?
- Nenti. Ca diri?
- Nenti ci fa!
Zaccanello, domenica 16 agosto 2015 piove, sale odore di terra, verde davanti a me, di piante, di giardino, di pino, biancore di strada. Palermo, martedì 2 ottobre 2018, nella notte insonne.
©piero carbone
N.B.
Ortografia provvisoria, da uniformare agli altri componimenti nell'eventuale, omonima raccolta di cui farà parte.
