PUPI DI ZUCCARU. Canta Antonio Zarcone

Musica di Antonio Zarcone Parole di Piero Carbone Alla fisarmonica Angelo Sanfilippo * Canzone eseguita a Caltanissetta il 29 ottobre 2023, presso la sala conferenza di Sicilbanca, in occasione dell'evento “Lu jornu di li morti”, organizzato dal Lions Club nisseno e dal Distretto 108 Yb Sicilia del Lions Club International. * Testo I Stanotti mi sunnavu muscardini, pupi di zuccaru e cannistra chini, Un angilu di zuccaru arridiva lu sonnu era duci e ma' finiva. San Giorgiu a cavaddru cummattiva di zuccaru Orlandu chi curriva. Sti cosi mi li vinniru a purtari li morti ca mi vinniru a truvari. Ritornello: Pupi di zuccaru, zuccaru e meli, faciti duci li me pinzeri. II Quann'era picciliddru ci cridiva, la notti p'aspittalli nun durmiva ma finarmenti quannu m'agghiurnava truvava li cannistra e li rigala. Purtavanu viscotta e cucciddrati fastuchi bomboloni e canniati. Cannistra di nucàtuli e taralli, di marturana, nuci e partualli. Ritornello: Pupi di zuccaru, zuccaru e meli, faciti duci li me pinzeri. III Filici era, aspittava un annu, era carusu e jiva dicennu: Sintiti, vi dicu la Virmaria, oh morti santi, viniti nni mia. Ora ca sugnu granni nun ci criju, si ci cridissi mi sintissi un diu, calassiru di n celu tempu nenti li santi morti pi farimi cuntenti. Ritornello: Pupi di zuccaru, zuccaru e meli, faciti duci li me pinzeri.