Quannu è Natali. Poesia di Piero Carbone

Oj è Natali. Almenu pi la fini di l’annu chiujlu, ti dissi, ssu giornali. Astutala, la televisioni. Vidi chi fannu?! Cosi veri ca parinu finti. Nni mpapocchianu pi farini accattari. Cosi finti ca parinu veri, pi farini scantari. Un’opira di pupi! Chiacchiari. parulazzi tinti. Arribballanu tanti culi e minni. Gliommari di cuttuni mpidugliatu. Scrusciu! E spati nni l’uocchi. Sbrizzi d’acitu nni li naschi chiusi. . Viju l’onesti jittati di latu. L’acitu sbuòmmica e bbuonu ti mmriàca. Lu cuttuni d’azzaru chi t’affuca. L’uocchi sbarracati: spati e sangu! Cosi chi sientu! Si vidinu sceni! Muorti comu muschi ammunziddrati. Matri mpazzuti patri dispirati calunnii jittati apposta vilinusi figli senza curpa abbannunati. Chiujlu, ti dissi, ssu giornali. Astutala la televisioni. Faciemmunillu n paci stu Natali. ©piero carbone Zaccanello, Natale 2015