VITA DI ISSARA. Penultima versione

Vita di issara

               Testo di Piero Carbone

                     Musica di Giuseppe Maurizio Piscopo

Rit. 

Issu, issara: vita di carcara.

Issu, carcara: vita di issara.

Issu, balati: forti cafuddrati. 

Furnu famìa: issu bianchìa.

I

A Buovu e Gargilata issu c’era,

Bivona ccu Lercara china nn’era,

ci nn’era a Grutti, c’era all’antri banni:

luciva e luci muntagni muntagni.

Carretti sientu nni la notti scura,

un cantu, griddri, pidati di mula.

Carrianu, li scecchi di issara,

a prucissioni: su li urdunara.

Rit. 

II

Issotta, ciarmaliddri e baddruttati

Di hiatu e di sudura ncuttumati.

Biancu issu li mura abbianchìa.

Sciloccu nni li casi un ci putìa

Antichi casi di servi e patruna,

palazzi o cubbula senza purtuna

mpastati cu lu issu di carcara

e chiesi chini d’angili e d’antara. 

Rit. 

III

Ti nfurna, lu issaru, e mazzulìa,

balata, ca t’arrienni cu dulia

a cuorpi di mazzuottu e di sudura.

ti macinia, e iddru si ncuddrura.

Lu issu biancu ricotta paria,

tu ci hiuhiavi n pruvuli e spirìa:

resisti ancora; lu cimentu vinni:

palazzi frolli, ponti ntinni ntinni.

Rit. 

IV

Lu fuocu di lu tiempu cuciunia

E ardi e coci, a tutti nni famìa

A tutti com’abbastru di carcara,

bianchi dintra e fora chi nn’affara.

Nn’affara e coci, riduci a farina,

Mpastata cu suduri di carina.

Facivanu accussi nni la carcara.

Oh, issu binidittu di issara!

Rit. diversificato:

Issu, issara: vita di carcara.

Issu, carcara: vita di issara.

Issu, sudura: mpinti mura mura.  

Figli, lu pani, aspettanu dumani.

Recitato finale:

Figli, lu pani, aspettanu dumani

ph ©Giuseppe Pasquale Palumbo